Հրատարակվել է «ՀՀ Աշխատանքային նոր օրենսգիրք» չորսհատորյակի երկրորդ գիրքը
28/06/2006
2006թ. հունիսի 28-ին հրապարակվեց «Գործատուի ներքին և անհատական իրավական ակտեր» ձեռնարկը՝ «Կոնցեռն Դիալոգ» փաստաբանական գրասենյակի տնօրեն Սեդրակ Ասատրյանի և Միավորված աշխատանքային կուսակցության անդամ Հովսեփ Պողոսյանի համահեղինակությամբ:
Ձեռնարկը «ՀՀ Աշխատանքային նոր օրենսգիրք» չորսհատորյակի երկրորդ գիրքն է և հրատարակվել է «Ինտեր Կռնակ» ընկերության կողմից 600 օրինակ տպաքանակով: Այն բաղկացած է յոթ բաժիններից, որոնք լուսաբանում են ձեռնարկություններում ներքին կարգապահական կանոնները, աշխատանքային պայմանագրերի լուծման կարգը, պաշտոնների հրահանգները, լիակատար նյութական պատասխանատվության մասին պայմանագրերը, թափուր աշխատատեղերի համալրման ընթացակարգերը, գործատու-աշխատող հարաբերությունները կարգավորող այլ իրավական ակտերը, դրանց վերաբերյալ ՀՀ կառավարության ընդունած որոշումները:
Հունիսի 27-ին ձեռնարկի հեղինակներ Սեդրակ Ասատրյանն ու Հովսեփ Պողոսյանը հանրությանը ներկայացրին «Գործատուի ներքին եւ անհատական իրավական ակտեր» ձեռնարկի առանձնահատկությունները: Պարոն Պողոսյանը մանրամասնեց, որ չորսհատորյակի առաջին գիրքը նվիրված է եղել Աշխատանքային պայմանագրերին: Երրորդ գրքում անդրադարձ է արվելու սոցիալական գործընկերության ինստիտուտին և ՀՀ Աշխատանքի պետական տեսչության գործառույթների կարգավորմանը: Նշվեց, որ մշակվում է աշխատանքային հարաբերությունների խնդիրները լուսաբանող տպագիր և ինտերնետային պարբերականի ստեղծման ծրագիրը:
Պարոն Ասատրյանն ընդգծեց, որ ՀՀ Աշխատանքային օրենսգրքի մեկնաբանմանը և դրա կիրարկումն ապահովող այլ իրավական ակտերին նվիրված ձեռնարկների հրատարակումը անհրաժեշտություն էր, ինչի մասին վկայում է չորսհատորյակի առաջին գրքի արագ սպառումը:
Օրիգինալ հրապարակումը՝ http://www.armtown.com/news/am/yer/20060628/24929/