Քրեական իրավունքի դատախաղ Արմավիրի մարզում Ժաննա Սիմոնյանի հետ
26/09/2015
2015 թվականի սեպտեմբերի 26-ին Արմավիրի մարզի ընդհանուր իրավասության դատարանի Էջմիածնի նստավայրում կայացավ «Հայաստանյան մարզերում քրեական իրավունքի դատախաղ մրցույթ» ծրագրի հերթական փուլը: Դատախաղն անցկացվեց «ԻՀԱԿ» փորձագետների կողմից նախապես կազմված մտացածին քրեական գործի փաստերի շուրջ: Դատախաղին մասնակցում էին Արմավիր քաղաքի թիվ 1 և թիվ 4 դպրոցների թիմերը:
Մրցույթի հանձնաժողովի անդամների քվեարկության արդյունքում հաղթող ճանաչվեց Արմավիրի թիվ 1 ավագ դպրոցի թիմը, որը դատախաղի ընթացքում ներկայացնում էր պաշտպանության կողմը: Թիմերից մեկը մարզվել էր «Կոնցեռն-Դիալոգ» փաստաբանական գրասենյակի ավագ իրավաբան և գործընկեր, «ԻՀԱԿ» փորձագետ, փաստաբան Ժաննա Սիմոնյանի ղեկավարությամբ:
«Հայաստանյան մարզերում քրեական իրավունքի դատախաղ մրցույթ» ծրագիրն անցկացվում է «Իրավական հետազոտությունների ազգային կենտրոն» հասարակական կազմակերպության (ԻՀԱԿ)՝ ԵԱՀԿ երևանյան գրասենյակի աջակցությամբ և ՀՀ դատական դեպարտամենտի օգնությամբ: Դատախաղը վարում էին Արմավիրի մարզի ընդհանուր իրավասության դատարանի դատավոր Վահե Խալաթյանը, ՀՀ Վճռաբեկ դատարանի քրեական գործերով պալատի նախագահի ավագ օգնական Անի Դանիելյանը և ԻՀԱԿ փոխնախագահ Վիրաբ Խաչատրյանը:
Քրեական իրավունքի դատախաղ Հայաստանի մարզերում @ Իրավական հետազոտությունների ազգային կենտրոն