Սեդրակ Ասատրյան. Ոստիկաններն աշխատում են աչքաչափով (Քաղաքացու հայցն ընդդեմ պետավտոտեսուչի՝ անհիմն մեղադրանքի համար)
17/09/2007
2007թ. սեպտեմբերի 17-ին Կենտրոն և Նորք Մարաշ համայնքների առաջին ատյանի դատարանում քննվեց «Կոնցեռն Դիալոգ» փաստաբանական գրասենյակի վստահորդ Վահե Խաչիկյանի հայցն ընդդեմ ճանապարհային ոստիկան մայոր Հարությունյանի: Վահե Խաչիկյանին դատարանում ներկայացնում էր Կոնցեռն Դիալոգի տնօրեն Սեդրակ Ասատրյանը:
Հայցի առիթն այն էր, որ Երևանի Ֆրանսիական հրապարակում ճանապարհային ոստիկան մայոր Հարությունյանը ձեռքի շարժումներով կանգնեցրել է Վահե Խաչիկյանի մեքենան, իսկ վերջինիս չկանգնելուց հետո նրան մեղադրել փախուստի մեջ: Ըստ Խաչիկյանի՝ ոստիկանի մեղադրանքն անհիմն է:
Դատարանում Վահե Խաչիկյանի ներկայացուցիչ Սեդրակ Ասատրյանը տեղեկացրեց, որ ոստիկանին օրենքով արգելվում է ձեռքի շարժումներով մեքենան կանգնեցնել: Վկայակոչելով Ճանապարհային երթևեկության անվտանգության մասին օրենքի 17-րդ հոդվածը` Սեդրակ Ասատրյանն ընդգծեց, որ ճանապարհային ոստիկանը տրանսպորտային միջոցը կանգնեցնելու իրավունք ունի միայն ցուցաձողով, կարմիր ազդանշանով սկավառակի կամ բարձրախոսի միջոցով:
«Իմ պաշտպանյալի կողքին նստած ուղևորը վկայում է, որ ոստիկանը իրենց ձեռքով է կանգնեցրել: Նրանց թվացել է նույնիսկ, որ նա տաքսի է կանգնեցնում: Ամբողջ խնդիրն այն է, որ այդ ոստիկաններն աշխատում են աչքաչափով: Այդ ոստիկանի համար գրած կարգը նշանակություն չունի. ինքը ժառանգություն է ստացել` ինչ ուզենա, կանի վարորդների հետ», _ բացատրեց Սեդրակ Ասատրյանը:
Ավելին, նա համոզված է, որ եթե իրենք դատը շահեն, ապա «դա ավելի շատ օգուտ կլինի» պետավտոտեսչությանը: «Որովհետև դա նախադեպ կլինի, որ նրանք աչքաչափով չվերաբերվեն այդ ամենին, այլ կիրառեն սահմանված կարգերը», _ հավելեց Ս. Ասատրյանը: