Անկախ իրավաբանական ընկերությունների TAGLaw համաշխարհային դաշինքը հիմնադրվել է 1998 թ.-ին և այսօր աշխարհի հինգ խոշորագույն իրավաբանական դաշինքներից մեկն է։ TAGLaw-ին անդամակցում են բացառապես հեղինակավոր և մասնագիտական բարձր արժեքներով առաջնորդվող ընկերություններ՝ տեղական իրավաբանական շուկայի ծանրակշիռ փորձառությամբ։ Ընկերություններն ընտրվում են մասնագիտական ծառայությունների շրջանակի, հաճախորդների սպասարկման որակի մանրազնին ուսումնասիրության, ինչպես նաև՝ անդամ ընկերությունների երաշխավորագրերի հիման վրա։ TAGLaw-ի անդամ ընկերությունները հաճախորդներին մատուցում են միջազգային չափանիշներին՝ արագ արձագանքման, էթիկայի, կոնֆլիկտների լուծման, գնագոյացման և մի շարք այլ չափորոշիչներին համապատասխան ծառայություններ։

Կոնցեռն Դիալոգը TAGLaw-ին անդամակցող առաջին և միակ ընկերությունն է տարածաշրջանում։

2010 թ․-ից որպես TAGLaw-ի լիիրավ անդամ՝ Կոնցեռն Դիալոգն արդեն իսկ պրոֆեսիոնալ ծառայություններ է մատուցել իր վստահորդներին Ֆրանսիայում, Անգլիայում, Իսպանիայում, Կիպրոսում, ԱՄՆ-ի մի շարք նահանգներում և շարունակում է ընդլայնել գործունեության աշխարհագրությունը։

Մանրամասները՝ https://www.taglaw.com/component/mtree/firm-profiles/6576-concern-dialog-law-firm.html

Nextlaw Global Referral (by Dentons) ցանցը` աշխարհի խոշորագույն և նորարարական իրավաբանական ցանցն է, որը հիմնադրվել է 2016 թ.-ին՝ աշխարհի խոշորագույն իրավաբանական ընկերություններից մեկի՝ Dentons-ի կողմից։ Ցանցում ներգրավված են ավելի քան 200 իրավասությունները ներկայացնող 650-ից ավելի առաջատար ընկերություններ: Nextlaw-ն իր անդամ ընկերություններին և նրանց հաճախորդներին hնարավորություն է տալիս օգտվելու իրավաբանական ցանցի համալիր արտոնություններից՝ կապելով հաճախորդին ոլորտի և տարածաշրջանի լավագույն մասնագետների հետ՝ ներդնելով հատուկ ալգորիթմ և անդամների ընտրության հստակ մեխանիզմ․ անդամակցության միակ չափանիշը ապացուցված որակն է, միակ շարժառիթը՝ հաճախորդներին բարձրակարգ ծառայությունների մատուցումը։

Կոնցեռն Դիալոգը ցանցին անդամակցում է 2017 թ.-ից՝ ընտրվելով որպես մասնագիտական բարձր արժեքներով առաջնորդվող, տեղական շուկայում ծանրակշիռ փորձառություն ունեցող և հաճախորդների վստահությունը վայելող ընկերություն։

Մանրամասները՝ https://www.nextlawnetwork.com/ 

IsFin` Իսլամական շուկաների խորհրդատուներ կազմակերպությունն աշխարհում համբավ ունեցող և տարածված հարթակ է այն ընկերությունների համար, որոնք մասնագիտացած են իսլամական աշխարհից և դեպի իսլամական աշխարհ ներդրումներ ապահովելու հարցում՝ կամրջելով Արևմուտքն ու Արևելքը տնտեսական նախագծերի շուրջ։

IsFin-ում ընդգրկված են ավելի քան 75 երկրների ներկայացուցիչներ, որոնք տրամադրում են ամբողջությամբ տեղայնացված և համապարփակ խորհրդատվություն՝ առանց աշխարհագրական սահմանափակումների:

Կազմակերպության գործունեության շրջանակները ներառում են ներդրումային բազմաթիվ շուկաներ և ոլորտներ՝ հարկային դաշտ, խոշոր ենթակառուցվածքային նախագծերի ֆինանսավորում, ֆինանսաբանկային տիրույթ, վարձակալություն, վարկաիրավական խորհրդատվություն և այլն։

Կոնցեռն Դիալոգն այս համատեքստում ծառայում է իբրև կապող հարթակ զարգացող շուկաների և Պարսից ծոցի երկրների միջև՝ խոշոր նախագծերի իրականացման գործընթացում տրամադրելով համալիր խորհրդատվական ծառայություններ։

Մանրամասները՝ https://www.isfin.net/node/1846 

Հայաստանում ամերիկյան առևտրային պալատը (AmCham) մեր երկրի առաջատար բիզնես ընկերակցություններից է։ Լիովին անկախ և ինքնաֆինանսավորվող ընկերակցությունում ներգրավված են շուրջ 120 անդամ-կազմակերպություններ՝ տնտեսության գրեթե բոլոր ճյուղերից: Պալատը հիմնադրվել է 2000 թ.-ին և սերտորեն համագործակցում է Հայաստանում ԱՄՆ դեսպանատան, ինչպես նաև այլ դիվանագիտական ներկայացուցչությունների հետ։ Պալատն իր անդամների շահերը ներկայացնում է Հայաստանի կառավարությանը, միջազգային կազմակերպություններին և հայաստանյան ողջ գործարար համայնքին, խթանում է մրցակցային, թափանցիկ, ազատ և արդար բիզնես միջավայրի ձևավորումը, ինչպես նաև՝ ԱՄՆ և ՀՀ գործարար հարաբերությունների ամրապնդումը։

AmCham-ը հանդես է գալիս իբրև շահերի պաշտպանության հովանի՝ ներկայացնելով իր անդամների շահերն այնպիսի ասպարեզներում, ինչպիսիք են հարկային ու մաքսային ոլորտները:

Պալատը նաև հայաստանյան գործարար կյանքի մասին տեղեկությունների կարևոր աղբյուր է, քանի որ հրատարակում է միակ անգլերեն բիզնես ամսագիրը Հայաստանում։

Կոնցեռն Դիալոգն արդեն 10 տարի է, ինչ ակտիվորեն ներգրավված է ընկերակցության աշխատանքներում և հարթակի միջոցով հնարավորություն ունի բարձրացնելու ընկերության վստահորդների համակարգային խնդիրները պետական մարմինների հետ հարաբերություններում։

Մանրամասները՝ https://amcham.am/current-members/concern-dialog-law-firm-cjsc/

Գերմանիայի առևտրի և արդյունաբերության պալատի (AHK) գործընկեր՝ Գերմանական տնտեսական միության (ԳՏՄ) նպատակն է խթանել հայ-գերմանական երկկողմ տնտեսական կապերի զարգացումը: Միևնույն ժամանակ այն հայաստանյան ընկերությունների համար հրաշալի հարթակ է՝ գերմանական ձեռնարկությունների հետ կապ հաստատելու և համագործակցային հարաբերությունները զարգացնելու ու ընդլայնելու համար: Ներկայում միությունն ունի ավելի քան 60 անդամ-ընկերություն, որոնք հիմնականում Հայաստանի և Գերմանիայի հանրապետությունների տնտեսական և քաղաքական մարմիններն են։ Դրանց թվում իր ուրույն տեղն ունի Կոնցեռն Դիալոգ փաստաբանական ընկերությունը՝ որպես իրավաբանական համալիր խորհրդատվություն տրամադրող ընկերություն։

Միությունը ոչ միայն շահեր ներկայացնող կազմակերպություն է, այլ նաև ծառայություններ է մատուցում Հայաստանում և Վրաստանում աշխատող ձեռնարկություններին: ԳՏՄ-ն իր անդամների համար ողջամիտ ժամկետներում անվճար տրամադրում է շուկայի ամփոփ ուսումնասիրություններ։

ԳՏՄ-ին անդամակցությամբ Կոնցեռն Դիալոգը ձեռք է բերում շուկայի վերաբերյալ արժեքավոր հետազոտություններ, միջազգային գործընկերային հարաբերությունների բազմաթիվ հնարավորություններ։ Բացի այդ, որպես ԳՏՄ-ի անդամ, անվճար աջակցություն է ստանում Հայաստանի, Վրաստանի կամ Գերմանիայի հյուպատոսություններին դիմելիս։

Մանրամասները՝ https://dwv.am/ 

Հայ-բրիտանական գործարար պալատն օգնում է բրիտանական և հայկական ընկերություններին բիզնես հարաբերություններ հաստատել միմյանց հետ, ծավալել բազմաճյուղ համագործակցություն։ Պալատն աջակցում է դրանց զարգացմանը՝ առաջարկելով ծառայությունների լայն շրջանակ` սկսած դասընթացների և միջոցառումների կազմակերպումից մինչև շուկայի ուսումնասիրություն, իրավաբանական առաջնային խորհրդատվություն, մասնագիտական բիզնես վերլուծություններ և այլ հարակից ծառայություններ։

Պալատի անդամ-ընկերություններն առանձնանում են բոլոր նախագծերի վերաբերյալ իրենց նորարարական մոտեցմամբ և միջազգային հեռանկարներ ունենալու հաստատուն հավակնություններով։

Պալատն իր շուրջ է համախմբում նաև այնպիսի խոշոր կորպորատիվ և միջազգային կազմակերպությունների, որոնք մեկանգամյա կամ շարունակական համագործակցությամբ փորձում են նպաստել Մեծ Բրիտանիայի և Հայաստանի միջև երկկողմ առևտրային հարաբերությունների զարգացմանը:

Կոնցեռն Դիալոգ ընկերությունը, իրավաբանական բարձրակարգ խորհրդատվություն մատուցելով Հայ-բրիտանական գործարար պալատի գործընկերներ կազմակերպություններին, էապես բարձրացնում է իր դերն ու ճանաչելիությունը միջազգային ասպարեզում, մասնավորապես՝ հայ-բրիտանական գործարար շրջանակներում։ Պալատի հետ համագործակցության շնորհիվ Կոնցեռն Դիալոգը հնարավորություն է ստանում ընկերության միջոցով ներկայացնել վստահրոդների շահերը պետության հետ հարաբերություններում:

Մանրամասները՝ http://abbc.granatus.uk/ 

Առևտրի միջազգային պալատը հիմնադրվել է 1919 թ. Ֆրանսիայում՝ նպատակ ունենալով նպաստել միջազգային առևտրի զարգացմանը, բիզնեսի արդյունավետ ղեկավարմանը, գործարար ոլորտի ներկայացուցիչների համագործակցությանը։ Այն միավորում է ամենատարբեր ոլորտներ ներկայացնող հազարավոր ընկերություններ ու կազմակերպություններ աշխարհի շուրջ 130 երկրում՝ սերտորեն համագործակցելով միջազգային կառույցների հետ, ինչպիսիք են ՄԱԿ-ը, Համաշխարհային բանկը, ՎԶԵԲ-ը, և կարևոր դեր խաղալով բիզնես միջավայրի զարգացման ու բիզնեսի շահերի պաշտպանության հարցում։ ԱՄՊ-ին անդամակցության միջոցով ընկերությունները մասնակցում են միջազգային առևտրի կանոնների ու ներդրումային քաղաքականության ձևավորմանը։

ԱՄՊ Հայաստանի Ազգային կոմիտեն պաշտոնապես գործում  է 2018 թ.-ի մայիսից: Կոնցեռն Դիալոգ փաստաբանական ընկերությունը ԱՄՊ Հայաստանի Ազգային կոմիտեի հիմնադիր անդամ է, իսկ ընկերության ավագ գործընկեր փաստաբան Արամ Օրբելյանը՝ ԱՄՊ Արբիտրաժային դատարանի անդամ։

Մանրամասները՝ https://iccwbo.org/