«Հոլիդեյ Ինն Երևան» հյուրանոցում տեղի ունեցավ քննարկում՝ նվիրված այլընտրանքային ներդրումային գործիքներին Հայաստանում։ Պանելի ժամանակ քննարկվեցին Հայաստանում ներդրումային միջավայրը բարելավելու նպատակով օրենսդրական փոփոխությունները՝ կապված ՍԵՅՖ պայմանագրերի (SAFE), փոխարկելի փոխառությունների (convertible loan) և օպցիոն համաձայնագրերի հետ: Քննարկմանը մասնակցում էին «Կոնցեռն Դիալոգ» փաստաբանական գրասենյակի գործընկեր Լիլիթ Կարապետյանը, «Ձեռնարկությունների ինկուբատոր» հիմնադրամի իրավաբան Արամ Խաչատրյանը , Գիտության և տեխնոլոգիաների հրեշտակների ցանցի տնօրեն Ռուբեն Օսիպյանը,  «Ֆորմուլա» վենչուրային ֆոնդի գլխավոր գործընկեր Կարեն Վարդանյանը,  ՎԶԵԲ-ի Հայաստանի ներդրումային խորհրդի ավագ իրավախորհրդատու Հայկ Մալխասյանը։ 

Լիլիթ Կարապետյանը քննարկման ընթացքում ընդգծեց, որ փոխարկելի փոխառությունների վերաբերյալ նախկինում ամրագրված արգելքը զգալի խոչընդոտներ էր ստեղծում ընկերությունների գործունեության ընթացքում:

«Այս գործիքի բացակայության պայմաններում ընկերությունները ստիպված էին լինում ավելի բարդ մեխանիզմներ որդեգրել՝ ընկերության ֆինանսավորումը ապահովելու կամ ներդրումներ ներգրավելու համար: Օրենսդրական փոփոխությունները թույլ կտան ներդրողներին ապահովել իրենց մասնակցությունը ընկերության աճին՝ պարտքը ապագայում բաժնեմասերի վերածելու հնարավորությամբ»,- նշել է Լիլիթ Կարապետյանը: Մասնագետը նաև ընդգծել է, որ ՀՀ օրենսդրությամբ այս գործիքների ամրագրումը ճանապարհի միայն առաջին քայլն է, և անհրաժեշտ է շարունակական ուշադրության ներքո պահել գործիքները՝ դրանց կիրառման հետ կապված պրակտիկ խնդիրները վեր հանելու և լուծելու համար:

Միջոցառման ընթացքում քննարկվել է նաև ՍԵՅՖ (Simple Agreement for Future Equity) գործիքի հետ կապված օրենսդրական փոփոխությունները, որը հատկապես տարածված է սիլիկոնային հովտում և այլ զարգացած ստարտափ էկոհամակարգերում:

Պանելիստները ընդգծել են դրա վերաբերյալ կարգավորումների անհրաժեշտությունը և նշել, որ Հայաստանում ևս արդեն իսկ կիրառվում է այս գործիքը:

Միջոցառման մասնակիցները միաձայն նշել են, որ այս ուղղությամբ աշխատանքները պետք է շարունակվեն և արագացվեն՝ հաշվի առնելով արդի մարտահրավերներն ու համաշխարհային փորձը:

Միջոցառումը կազմակերպվել է Հայաստանի ներդրումային խորհրդի կողմից՝ ՎԶԵԲ-ի և Միացյալ Թագավորության «Լավ կառավարման հիմնադրամի» աջակցությամբ: