Կոնցեռն Դիալոգ-ի իրավաբանները վերապատրաստվել են Ստրասբուրգում
06/03/2018
Փետրվարի 13-15 Եվրախորհրդի HELP ծրագրի շրջանակներում Ստրասբուրգում անցկացվեց «Մարդու իրավունքներ եւ ընտանեկան իրավունք» թեմայով վերապատրաստման առաջին դասընթացը, որին մասնակցում էին Հայաստանի եւ Ռուսաստանի փաստաբանական պալատների փորձառու մասնագետները։ Հայաստանը ներկայացնում էին 5 փաստաբան, այդ թվում նաեւ Կոնցեռն Դիալոգ ընկերության փաստաբաններ՝ Նարինե Բեգլարյանը եւ Ժաննա Սիմոնյանը։
Դասընթացի շրջանակներում փաստաբաններին հնարավորություն է ընձեռվել հանդիպելու Եվրադատարանի իրավաբանների հետ, ինչպես նաև ներկա գտնվելու որոշ դատական լսումների՝ Մարդու Իրավունքների Եվրոպական դատարանի Մեծ պալատում:
Մասնավորապես, փետրվարի 14-ին փաստաբանները ներկա են եղել «Մուրթազալիեւան ընդդեմ Ռուսաստանի» գործի քննությանը, որի ընթացքում լսել են հայցվորի եւ պատասխանողի պարզաբանումները, իսկ փետրվարի 15-ին մասնակցել են նմանատիպ, բայց արդեն ուսումնական՝ «Հայրապետյանն ընդդեմ Ռուսաստանի» գործի քննությանը։
Դասընթացն արդյունավետ է եղել ոչ միայն մարդու իրավունքների եւ մասնավորապես ընտանեկան իրավունքների հիմնահարցերը քննարկելու, այլ նաեւ Հայաստանի Հանրապետության եւ Ռուսաստանի Դաշնության փաստաբանական պալատների միջեւ համագործակցությունը խորացնելու առումով, նշել են մասնակից փաստաբանները։